De electoribus et de eligibilibus

Ut quis in electione prioris voce activa gaudeat, præter condiciones de quibus in nn. 439, 440 et salvo n. 458, requiritur ut in conventu ubi fit electio sit directe assignatus.

Fratres qui ratione muneris extra conventum suæ assignationis residentiam habitualem habent, in electione prioris voce non gaudent nisi post suum reditum definitivum (cf. appendicem n. 19). Pro ceteris casibus diuturnæ absentiæ vel notabilis distantiæ fratrum a conventu suæ assignationis, capitulum provinciale determinet condiciones sub quibus iidem fratres in electione prioris participare valeant (cf. n. 336).

Frater in priorem conventualem eligendus oportet ut sit prudens, caritativus, regularis observantiæ et apostolatus zelator. Præter condiciones de quibus in n. 443, ad validitatem electionis requiritur ut: non fuerit prior in eodem conventu per duo triennia successiva immediate præcedentia; non actualiter exerceat officium visitatoris generalis, regentis studiorum, moderatoris centri studiorum institutionalium, magistri novitiorum vel fratrum studentium.

Si aliquis frater non est eligibilis ob aliquod ex impedimentis in n. 459 § II indicatis, vocales eum postulare possunt a competenti superiore, ad quem nimirum pertinet electionem confirmare. Frater sic postulatus et institutus, accepto officio et capta eiusdem possessione, eo ipso absolvitur a quocumque officio incompatibili, nisi dispensetur a magistro Ordinis.