De magistro Ordinis

Magister Ordinis, cum sit successor s. Dominici et principium unitatis Ordinis, est proprius et immediatus prælatus omnium fratrum, conventuum et provinciarum vi professionis obœdientiæ sibi a singulis sodalibus factæ.

Officium suum obtinet per electionem canonicam, et in eo perdurat per novem annos. Tempus computatur a capitulo electivo usque ad sequens capitulum electivum, neglectis paucis mensibus, semestre tamen non excedentibus, qui ad integritatem novem annorum desunt aut superfluunt.

Magister Ordinis, gravi de causa, potest priores provinciales ac conventuales et quoscumque officiales, necnon priorissas monasteriorum Ordini subiectorum, instituere ac destituere, eorumque officia et auctoritates limitare, eaque agere in Ordine quæ ipse et diffinitores capituli generalis iuxta leges nostras agere possunt. Durante suo munere magister Ordinis per se vel per socios aut per alios bis saltem Ordinem universum visitare tenetur. Magister Ordinis non potest cedere iura officii sui in præiudicium suorum successorum.

Quotiescumque in litteris aut rescriptis magistri Ordinis ponitur auctoritate officii nostri, aut alia huic æquivalens clausula, hæc complecti censeatur tum ordinariam tum aliam quamlibet auctoritatem officio delegatam.

Magister Ordinis potest in sui adiutorium instituere vicarios sive super totum Ordinem sive super unam vel plures regiones, unam vel plures provincias, unum vel plures conventus.

Vicarius super totum Ordinem habet potestatem ac ipse magister, nisi aliud iure aut litteris institutionis caveatur. Alii vicarii eam habent auctoritatem quam ipse magister determinaverit. Omnes perdurant in officio quousque a magistro Ordinis revocati fuerint. Cessante magistro Ordinis, officium vicarii super totum Ordinem exspirat; officium vero aliorum vicariorum, perdurat quousque per novum magistrum aliter dispositum fuerit.