1. Cessante ab officio priore provinciali ad normam n. 344 § I, vicarius provinciæ erit, iuxta determinationem in statuto provinciæ factam: aut ipse prior provincialis ab officio cessans aut aliquis frater qui est vel fuit in provincia prior conventualis. vel prior conventus ubi proximum capitulum provinciale celebrandum erit aut, si iste conventus tunc priorem non habuerit, prior conventus ubi celebratum est ultimum capitulum, et sic retrocedendo; – vel ipse prior provincialis ab officio cessans.
2. Cessante ab officio priore provinciali aliis de causis, vicarius provinciæ erit socius illius prioris provincialis usque ad diem immediate ante vigiliam capituli provincialis, a qua die vicarius erit prior conventualis ubi proximum capitulum provinciale celebrandum erit, aut si iste conventus tunc priorem non habuerit, prior conventus ubi celebratum est ultimum capitulum, et sic retrocedendo. Hæc postrema norma servetur etiam deficiente socio.
3. Cum prior provincialis a iurisdictione exercenda impeditur, recurrendum est ad magistrum Ordinis. Et si recursus non sit possibilis, socius prioris provincialis fit vicarius provinciæ, ut supra in § II.
4. Prior provincialis qui ob infirmitatem impeditur a suis muneribus rite obeundis, sine spe valetudinem infra sex menses recuperandi, officio suo renuntiet.
5. Si voluntatem suam renuntiandi communicare non potest vel non vult, socius prioris provincialis consilium provinciæ convocare et eum præsidere debet, etiam sine priore provinciali. Hoc consilium potest recurrere ad magistrum Ordinis qui capitulum extraordinarium electivum (cf. n. 351 § II), convocet vel vicarium provinciæ ut vicarium magistri Ordinis instituat.

1. In qualibet provincia sit syndicus qui de bonis provinciæ curam habeat secundum normas pro administratione statutas. 
2. Frater qui hoc officio functus fuerit, immediate potest iterum institui, non autem tertio.

1. Ad primum consilium provinciae quod elapso biennio post prioris provincialis confirmationem locum habebit, prior provincialis convocare tenetur, praeter membra consilii, priores regionales, vicarios provinciales et priores conventuales, nisi aliud a capitulo provinciali determinatum fuerit quoad priores regionales, vicarios provinciales et priores in dissitis regionibus.
2. In hoc consilio ampliori, quod voto gaudet tantum consultivo, tractanda sunt omnia quæ ad bonum provinciæ utilia videbuntur, et in primis inspiciatur an ad praxim reductæ sint ordinationes et exhortationes ultimi capituli provincialis et generalis.

Inter alia, in consilio provinciæ tractari debent: 

1. institutio vel amotio vicarii provincialis prioris regionalis et prioris conventualis; 
2. præsentatio vel amotio parochi; 
3. erectio domus in conventum, ad normam n. 262; 
4. cassatio decisionis consilii vel capituli conventualis exclusis consiliariis in illo conventu assignatis; 
5. transfiliatio fratris; 
6. exclusio fratris a voce activa gravi de causa ad tempus facienda; 
7. declaratio facti ad dimissionem fratris ad normam iuris (CIC 694 § 2).