Ad priorem provincialem præcipue pertinet:
curare ut in planificatione, de qua infra n. 107, debita
attentio præbeatur exigentiis vitæ intellectualis et apostolatus doctrinalis,
salvis iis quæ de formatione fratrum dicuntur n. 226;
cooperari cum magistro Ordinis in promovenda missione
doctrinali Ordinis;
promovere collaborationem inter conventus et fratres suæ
provinciæ necnon cum aliis provinciis præsertim finitimis;
fovere fratrum participationem sessionibus studiorum, secundum
congruentiam officii vel ministerii eorum;
in visitatione canonica curare de recta observantia eorum quæ
de studio præcipiuntur, speciatim de statu bibliothecarum;
quolibet anno cum suo consilio statuere summas pecuniæ
necessarias ad studiorum promotionem.
In hoc munere adiuvatur a commissione de vita intellectuali provinciæ. Membra
huius commissionis sunt regens studiorum qui est eius præses, moderator centri
studiorum institutionalium, promotor formationis permanentis et alii qui eliguntur
iuxta modum in statuto provinciali determinatum. Huius commissionis, sub
auctoritate prioris provincialis est:
consilium prævium dare in rebus maioris momenti ad studia
pertinentibus;
rationem particularem provinciæ proponere et applicare;
centrorum studiorum provinciæ activitates coordinare;
quotannis rationem reddere in consilio provinciæ de vitæ
intellectualis statu in provincia.
Adiuvatur etiam a promotore provinciali formationis permanentis, a capitulo
designando, cui munera et dedicatio ab ipso capitulo præscribentur.
Pro vicariatibus provinciæ, modus analogus ad studium promovendum in statuto ipsorum
stabiliatur.