Ad professionem castitatis in Ordine adspirantes, officia et dignitatem matrimonii
debite agnoscant, quod amorem inter Christum et Ecclesiam repræsentat; et intelligant
Dei gratia seipsos ad altiorem manifestationem eiusdem amoris esse vocatos.
Cum autem observantia perfectæ continentiæ profundiores naturæ humanæ
inclinationes intime attingat et cum in Ordine nostro sit condicio ad ministerium
apostolicum fructuose exercendum, necesse est ut fratres progressive maturitatem
physicam, psychicam et moralem acquirant.
Decursu evolutionis necessariæ ad castitatem profundius et firmius radicandam,
fratribus præbeantur positiva institutio et apta subsidia, humana simul ac divina, ut
ipsi difficultatibus et periculis feliciter superatis ad naturalem et supernaturalem
integrationem totius vitæ affectivæ pervenire queant.