De formatione permanenti

Propositum fundamentale formationis permanentis est renovatio et maturatio fratrum secundum diversas “ætates” eorum vitæ, ut semper magis idonei fiant ad annuntiandum Verbum Dei gentibus, quæ rebus mundi hodierni adiunctis signantur. In communitate provinciali munus formationis permanentis pertinet ad priorem provincialem, cui assistit promotor provincialis formationis permanentis; in communitate conventuali ad priorem conventualem, cui assistit lector conventualis, et ad capitulum conventuale; in communitate vero domus ad superiorem.

Adsit in omni provincia promotor formationis permanentis cuius est sub auctoritate prioris provincialis: programmata annualia formationis permanentis elaborare, adiuvante commissione de vita intellectuali provinciæ; cum prioribus et lectoribus conventualibus necnon superioribus domorum semel saltem in anno huiusmodi programmata (provinciæ nempe et conventuum domorumque) coordinare, audito tamen regente studiorum quando agitur de studiis; communicationes inire cum aliis centris et institutis pro formatione permanenti necnon cum in hac disciplina peritis. Promotor provincialis formationis permanentis a capitulo provinciali ad quadriennium instituitur. Durante munere: moderator est centri formationis permanentis provinciæ, salvo n. 92-bis § I; membrum est commissionis de vita intellectuali provinciæ; subsidium œconomicum in ratione æstimata (“budget”) provinciæ quotannis habet.