Ad institutionem fructuose accipiendam, ex parte candidati requiruntur sanitas physica, maturitas psychologica proportionata eius ætati, idoneitas ad vitam socialem, vitæ christianæ congrua soliditas, aptitudo, recta intentio et libera voluntas Deo et Ecclesiæ sese vovendi in vita dominicana.

Ad hoc tendere debet institutio ut alumni modo progressivo ducantur ad plenitudinem vitæ et apostolatus quæ sunt Ordini propria secundum ea quæ in legibus nostris necnon in Ratione generali formationis dicuntur.

Consociationes Ordini adnexæ, vitæ christianæ renovationem in populo Dei foventes, bono spirituali fidelium inserviunt et simul Ordini collaborationem in aliquo speciali apostolatu præstant (cf. appendicem n. 4).

Fraternitates laicales Ordinis sunt associationes laicorum qui speciali Dei dono in spiritu apostolico s. Dominici coadunati, “suam et aliorum salutem procurare intendunt” per professionem vitæ evangelicæ, secundum formam vivendi ab Ordine pro eorum statu in sæculo adaptatam et rite adprobatam. Habeantur quoque fraternitates sacerdotum, qui vitam et ministerium suum spiritu s. Dominici informare satagant.

Sodales institutorum sæcularium, quæ Ordini aggregantur, consiliorum evangelicorum professionem in sæculo secundum spiritum s. Dominici amplectuntur.

Sorores, spiritu ac zelo s. Dominici imbutæ, verbo et opere testimonium Evangelio reddunt intima communione cum fratribus coniunctæ in ædificationem populi Dei.

Moniales Ordinis, ex proposito S. Dominici, vita sua religiosa contemplativa totaliter vacant communicationi cum Deo, ex qua vita apostolica fratrum sicut et aliorum cœtuum familiæ dominicanæ nutritur, dum testimonium præbent orationis, silentii et pænitentiæ.

Omnes cœtus familiam dominicanam constituentes (cf. n. 1 § IX), communis vocationis participes, singuli suo modo missioni Ordinis in mundo inserviunt.

Exercitio muneris confessarii præmittatur examen speciale. Modus hoc examen faciendi in Ratione generali studiorum statuitur. Fratres examen subire debent infra sex menses ab institutionali studiorum curriculo theologico absoluto, vel ab ordinatione sacerdotali si hæc quacumque ex iusta causa differatur. Ante hoc examen requiritur ad validitatem votatio de moribus de qua n. 318, 4°.