1. Socii adiuvant magistrum Ordinis in exercitio sui muneris super totum Ordinem; eorum consensu vel consilio magister Ordinem regit, tractando et decernendo quæstiones maioris momenti pro vita totius Ordinis. 
2. Socii magistri Ordinis sunt non minus quam octo et non plus quam decem. Ex eis duo tres præponuntur negotiis quæ respective apostolatum, et vitam intellectualem et vitam fraternam ac formationem in Ordine respiciunt, aliis cura confertur de relatione provinciarum cum Ordine et de aliis materiis forte a magistro Ordinis ipsis commissis (cf. n. 428).

Ad collaborationem inter provincias unius regionis vel nationis fovendam haberi possunt: 

1. colloquia periodica inter priores provinciales vel diversos officiales, ut magistros novitiorum, fratrum studentium et cooperatorum, regentes, professores, promotores, etc.; 
2. sessiones vel commissiones interprovinciales pro problematum communium studio; 
3. promotores nationales vel regionales pro diversis operibus; 
4. novitiatus vel studentatus communis vel centra communia, iuxta normas a magistro Ordinis adprobandas; 
5. conventio, de consensu magistri Ordinis ineunda, pro erectione conventuum interprovincialium, necnon pro assignationibus faciendis de una provincia ad alteram. 
6. conventio duorum capitulorum provincialium vel priorum provincialium ad directam assignationem faciendam de provincia ad conventum alius provinciæ, salvis nn. 270 § I et II, 497 § I et 600, monito tamen magistro Ordinis (cf. appendicem n. 16). Talis conventio recognatur semel saltem in quinquennio a prioribus provincialibus quibus interest.

1. In unoquoque vicariatu adsit consilium, cuius consensum vel consilium vicarius provincialis circa maiora negotia exquirat, ad normam statuti vicariatus. Acta huius consilii post coadunationem priori provinciali mittenda sunt. 
2. Numerus et modus electionis vel institutionis horum consiliariorum a statuto vicariatus determinentur. 
3. Quando autem prior provincialis, secundum normas in Libro Constitutionum et Ordinationum vel in Statuto provinciæ et vicariatus stabilitas, tractare debet de rebus quæ vicariatum respiciunt, tunc primum consilium vicariatus consulat priusquam ad consilium provinciæ requirat; casus vero confirmandi, instituendi vel amovendi priorem regionalem prior provincialis in consilio provinciæ tractet (cf. n. 373, 1°).