1. Pro unione duarum entitatum (provinciarum, vice-provinciarum vel vicariatuum) requiruntur:
   1. votum consilii utriusque entitatis quoad negotia mutua de unione tractanda;
   2. consultationes fratrum et capitulorum omnium conventuum domorumque in iisdem entitatibus modo a singulis entitatibus elaborato;
   3. statutum speciale a magistro Ordinis adprobatum pro celebratione capituli utriusque entitatis, in quo entitates suffragium ferunt an unio magistro Ordinis proponatur, et pro celebratione primae congregationis ad instar capituli novae entitatis;
   4. decisio magistri Ordinis cum suo consilio; primus superior novae entitatis a magistro Ordinis instituitur.
2. Fusio duarum entitatum et unio vel fusio plurium entitatum mutatis mutandis modo in § I descripto fiant.
3. In casu divisionis provinciae modus procedendi a consilio provinciae elaboretur et a magistro Ordinis cum suo consilio adprobetur. (B, n. 254)

1. Presbyteri studentes extra studentatum manentes, a priore vel ab aliquo patre presbytero a priore provinciali designato, opportunis colloquiis et exercitationibus in vitam et apostolatum sacerdotalem gradatim introducantur. 
2. Sint tamen semper sub iurisdictione prioris conventus, salvis iuribus regentis quoad studia.

Presbyteri professi votorum temporariorum, ut in spiritu dominicano et regularis disciplinæ observantia confirmentur, saltem per triennium debent remanere in studentatu sub cura magistri, vel in alio loco sub cura alicuius patris secundum determinationem prioris provincialis cum suo consilio.