Ad collaborationem inter provincias unius regionis vel nationis fovendam haberi possunt: 

1. colloquia periodica inter priores provinciales vel diversos officiales, ut magistros novitiorum, fratrum studentium et cooperatorum, regentes, professores, promotores, etc.;
2. sessiones vel commissiones interprovinciales pro problematum communium studio;
3. promotores nationales vel regionales pro diversis operibus;
4. novitiatus vel studentatus communis vel centra communia, iuxta normas a magistro Ordinis adprobandas;
5. conventio, de consensu magistri Ordinis ineunda, pro erectione conventuum interprovincialium, necnon pro assignationibus faciendis de una provincia ad alteram.
6. conventio duorum capitulorum provincialium vel priorum provincialium ad directam assignationem faciendam de provincia ad conventum alius provinciæ, salvis nn. 270 § I et II, 497 § I et 600, monito tamen magistro Ordinis (cf. appendicem n. 16). 

1. Prior regionalis praeest vicariatui ut vicarius prioris provincialis et, praeter facultates a capitulo provinciali statutas, ius habet:
   1. assignandi fratres qui sunt in vicariatu, salvis iuribus prioris provincialis;
   2. confirmandi priorem conventualem ad normam n. 467, et instituendi superiores domorum ad normam n. 332, nisi statutum vicariatus aliter provideat;
   3. participandi ex officio consilio provinciae, nisi aliud in statuto provinciae determinatum sit;
   4. participandi ex officio capitulo provinciali (cf. 352 § I, 1°).
2.  
   1. Prior regionalis ad quadriennium eligitur a vocalibus in regione assignatis et a priore provinciali de consensu sui consilii confirmatur;
   2. expleto tempore pro quo prior regionalis electus fuit aut eo quocumque modo cessante, officium eiusdem exercetur a priore antiquiori in Ordine in eodem vicariatu usque ad confirmationem successoris;
   3. pro priore regionali, mutatis mutandis, valent quae praescribuntur de priore conventuali in n. 302 § I.
       

1. Munus consilii provinciæ est priorem provincialem adiuvare in officio rite adimplendo, præcipue in iis quæ a capitulo provinciali statuta fuerunt et decursu temporis opportuna vel necessaria videbuntur ad apostolatum et ad vitam regularem promovendam.
2. In consilio provinciæ negotia graviora decerni debent voto decisivo nisi aliter in legibus nostris determinatum fuerit.
3. Si suffragia aliquando fuerint æqualia, præses suo voto paritatem dirimat, salvo CIC 127, § I.