Omnes eligantur unus post alium, ab omnibus vocalibus capituli. Quaelibet electio terminatur in septimo scrutinio, quo in casu sufficit maioritas relativa, firmo n. 450 § III.

Vocales a capitulo provinciali vel a provinciali cum suo consilio, in plura collegia dividantur secundum numerum et regiones, ita ut quodlibet collegium habeat non minus quam decem et non plus quam viginti vocales. Si vero in aliqua regione vocales sunt minus quam decem, adiungantur ad aliud collegium electivum.

1. Ad consilium provinciale vel ad consilium regionale pertinet determinare utrum vocales debeant specialiter in unum convenire pro electione facienda vel suffragium suum per litteras mittere.
2. Si electio facienda est in congregatione speciali:
   1. præses et locus electionis sint ut in n. 477;
   2. in ipso actu electionis servetur n. 464 (cf. appendicem n. 18).
3. Si vero vocales non possunt de facili in unum convenire, fiat iuxta normas sequentes: n. 455-bis.
   1. infra tempus a præside statutum (n. 477, § II), quilibet vocalis suffragium suum in aliqua schedula scribat ad normam n. 452, 6°;
   2. deinde, schedula in involucro intromissa, super ipsum involucrum bene clausum scribat manu propria suum nomen et locum residentiæ. Postea illud in alio involucro includat et mittat ad præsidem cum alia inscriptione, tali modo quod possit de facili discerni.
4. Elapso tempore præfixo pro receptione schedularum, præses cum consilio regionali scrutinium faciat:
   1. omnibus involucris externis coram consilio apertis, examinentur nomina electorum super interiora involucra scripta ad videndum utrum unusquisque eorum condiciones pro voce activa requisitas habeat; si non habeat, pro nullo habeatur suffragium;
   2. comparentur numeri vocalium et involucrorum;
   3. involucra aperiantur et, antequam schedulæ explicentur, ipsa deleantur;
   4. examinentur suffragia ad normam n. 452, 9°, 10°, 11°;
   5. si maioritas pro electione vel postulatione requisita obtinetur, tunc formetur a præside decretum electionis, instrumentum authenticum electionis conficiatur et ad priorem provincialem mittatur iuxta n. 453, § I (cf. appendicem n. 24). De exitu electionis omnes vocales per litteras certiores fiant;
   6. si vero maioritas absoluta in primo scrutinio non obtinetur, præses cum consilio determinet tempus pro novo et ultimo scrutinio faciendo, et de omnibus peractis tum priorem provincialem, tum vocales per litteras certiores faciat;
   7. capitulum tamen provinciale potest determinare, ut procedatur ad tertium vel etiam quartum scrutinium, si in secundo vel tertio adhuc maioritas absoluta non obtinetur;
   8. si in ultimo vero scrutinio, sive sit secundum (n. 6°), sive tertium (n. 7°), illi duo tantum praesentari possunt qui in praecedenti scrutinio maiorem numerum suffragiorum retulerint, firmo n. 450 § III. Hoc in casu pro electo, si concurrat cum postulato, sufficit maioritas relativa, pro postulato vero, duae tertiae partes requiruntur.

1. Facta convocatione, fratres quibus ius competit, ad magistrum vel vicarium Ordinis transmittant petitiones vel quæstiones, quas capitulo velint proponere.
2. Ius proponendi competit, præterquam vocalibus capituli:
   1. omnibus superioribus maioribus, sociis magistri Ordinis et procuratori generali;
   2. cuilibet capitulo et consilio necnon moderatorio centri studiorum;
   3. cuique religioso, dummodo eius propositio a quinque saltem fratribus voce activa gaudentibus subsignata fuerit, vel præsentetur per aliquem ex vocalibus cuius erit iudicare utrum petitio proponi debeat necne;
   4. monasteriis vel fœderationibus monialium nostrarum; consiliis provincialibus vel nationalibus fraternitatum S. Dominici.
3. Consilia generalitia vel fœderationes congregationum Ordini aggregatarum desideria et suggestiones relate ad familiam dominicanam capitulo generali proponere possunt.
4.  
   1. Quæstiones capitulo generali proponendæ, ab iis quibus ius vel facultas competit, ad magistrum Ordinis mittantur sex quatuor mensibus ante celebrationem capituli;
   2. breviter exponantur lingua latina atque tot in foliis separatis proponantur quot distinctæ sint quæstiones.
5.  
   1. Magister Ordinis curabit ut quæstiones, de quibus in § IV, 1° pro diversa materia diversis commissionibus assignatæ, quamprimum singulis membris capituli communicentur;
   2. membra harum commissionum sunt: fratres vocem habentes in capitulo, inclusis sociis priorum provincialium et diffinitorum iure eligendi fruentibus (cf. n. 407 § III); adsistentes Magistri Ordinis ab ipso Magistro designati (cf. n. 410 § I); priores provinciales de quibus in n. 258, vice-provinciales et vicarii generales territorium nullius provinciae vel vice-provinciae aut delegatus ex eisdem ad normam n. 410 § II;
   3. ii omnes statim magistro Ordinis indicent, secundum ordinem præferentiæ, tres commissiones ad quas pertinere desiderant, salvo semper iure magistro Ordinis secundum necessitates capituli libere disponendi;
   4. deinde magister Ordinis præsides commissionum instituat et capitulares certiores faciat de commissione cui unusquisque adscriptus fuit ut interim hi quæstiones accuratius perpendant quæ ad propriam commissionem assignatæ sunt.