Ministerium verbi est participatio muneris prophetici corporis episcoporum, ideoque in primis oportet ut prædicatores Evangelium integrum recipiant et mysterii salutis vivam intellegentiam quærant prout ab Ecclesia traditur et explicatur. Quo spiritu evangelico et doctrina solida sit semper signata prædicatio dominicana.
Ut autem eius actio salutifera omnes attingere possit, necesse est non
tantum attendere ad situationes et adspirationes hominum quos alloquimur sed etiam
vivum commercium cum illis instituere, ut verbi revelati accommodata prædicatio lex
omnis evangelizationis permaneat, præsertim apud eos qui a fide longe sunt. Sic mens
nostra pateat simul et spiritui Dei et cordibus eorum quibus verbum proponitur ut
communicationem lucis necnon amoris et virtutis Paracliti obtineat.
Quapropter fratres sciant agnoscere Spiritum in medio populi Dei operantem
et discernere thesauros in variis culturæ humanæ formis absconditos, quibus ipsius
hominis natura plenius manifestatur novæque viæ ad veritatem aperiuntur.
Fratres vitam spiritualem et virtutes humanas colere satagant ne moribus infirment quod ore proferunt.