De contributionibus

Contributiones ex auctoritate sive capituli generalis sive provincialis imponantur, secundum modum ab ipsis determinatum, et computantur inter expensas ordinarias tum conventuum tum provinciarum. Magister Ordinis cum suo consilio contributiones imponere potest conventibus sub sua immediata iurisdictione.

Contributiones inserviant adimpletioni rationis prævisæ seu æstimatæ (budget) ordinariæ. Imponendæ sunt secundum introitus singulorum conventuum aut provinciarum, servatis æquitate et proportione.

1. Incepta quæ maiorem pecuniæ quantitatem requirunt a contributionibus ordinariis ne pendeant, sed in ratione prævisa extraordinaria ponenda sunt. Media necessaria ad ista negotia peragenda in planificatione, de qua infra nn. 585 et sequentibus disponantur. 
2. Ad expensas capituli generalis quod attinet, præ mente habenda sunt: 
   1. expensæ itineris solvantur methodo sic dictæ peræquationis ita ut singuli capitulares de facto eamdem summam pecuniæ solvant; 
   2. expensæ pensionis et expensæ generales pro capitulo proportionaliter solvantur a curia generalitia et a singulis provinciis, inter quas æquitas et proportio servandæ sunt, modo stabiliendo in ipso capitulo; 
   3. sex mensibus ante convocationem capituli generalis syndicus Ordinis et syndicus conventus ubi fit capitulum generale, præparent rationem præventivam seu prævisam expensarum capituli, magistro Ordinis cum suo consilio submittendam. Postea ad singulas provincias mittatur ad eas consulendum.