De convocatione electorum eorumque obligatione suffragandi

Ad quamlibet electionem omnes vocales convocandi sunt ab eo qui de iure electioni præesse debet. In ipsa convocatione indicentur tempus et locus quibus electio facienda est. Defectus convocationis non obstat, si prætermissi nihilominus interfuerint, salvo CIC 166 § 3. Electio fiat intra tempus pro singulis officiis præscriptum, quo termino inutiliter elapso ius amittitur et provisio officii devolvitur ad competentem superiorem.

Cum ius eligendi sit præsertim in bonum publicum Ordinis, omnes electores tenentur convocationi obtemperare. Qui sine iusta causa a superiore maiori adprobata, a suffragio ferendo abstinuit in electione superiorum, voce activa privatus manet pro quacumque electione per integrum annum, a die prædictæ abstentionis computandum.

Elector de suo iure eligendi et de convocatione peracta certus, tenetur ad electionem accedere etsi convocationem non acceperit. Electores dubii, etiam sponte advenientes admitti debent ad electionem, sed cum protestatione.