Curriculo studiorum peracto, iuvenes presbyteri religiosæ et apostolicæ vitæ cum sensu responsabilitatis applicentur, ita ut ministerium sacerdotale vitam eorum spiritualem et intellectualem revera foveat et integret, conscii specialium problematum quæ primis annis sui sacerdotii ipsis impendent. Fratres, præsertim superiores, iuvenes presbyteros in eorum ministeriis fraterne adiuvent consilioque adsistant.

Opportunitas et modus faciendi votationem de moribus religiosis ante examina a capitulo provinciali determinentur, salvis præscriptis n. 251 § III.

Fratres studia complementaria peragant in institutis specialibus, secundum determinationes planificationis provinciæ (cf. supra n. 107), ratione habita aptitudinis et propensionis singulorum. Durante curriculo institutionali aliquam præparationem ad hæc studia incipere possunt.

De cœtus professorum iudicio et cum licentia prioris provincialis, fratres mitti possunt ad universitates ut aliquibus studiis incumbant, etiam durante curriculo studiorum, attentis uniuscuiusque qualitatibus et condicionibus regionum; in hoc casu salva sit semper coordinatio cum formatione intellectuali Ordini propria. Studiis tamen in universitate peractis, fratres complere non omittant studia Ordini propria si nondum sint expleta.

Quantum ad philosophiam et theologiam tradendas, serventur ea quæ statuuntur in decreto “Optatam totius” Concilii Vaticani secundi (nn. 13–19), speciatim attendendo ad: studium scientificum fontium, præcipue quidem, quod ad theologiam attinet, Sacræ Scripturæ; momentum syntheseos systematicæ quærendæ ope speculationis sub ductu s. Thomæ magistri (cf. n. 82 supra); problemata singulis temporibus et pro unaquaque regione urgentiora.

Professores inter se et etiam cum studentibus veram communionem intellectualem instituere nitantur sicque formationi omnium et singulorum studentium efficacius incumbent. Fratres ministerio addicti pro opportunitate invitentur ad colloquia cum professoribus et studentibus habenda de quæstionibus quæ homines magis movent ideoque incitamenta studiis præbent.

Professores assidua perseverantia studio vacent ut magis ac magis efficiantur in sua disciplina periti et ad investigationem scientificam idonei; conscii tamen sint quod moderata activitas pastoralis utilis eis est in munere studendi et docendi.

Quo aliquis instituatur professor in centro studiorum institutionalium, requiritur ut, post curriculum institutionale, studia complementaria præsertim circa materiam suæ disciplinæ, secundum determinationes Rationum studiorum perficiat. Insuper congrua experientia ministerii pastoralis et pædagogica formatione præditus sit.