1. Statutum provinciæ est collectio ordinationum de vita et regimine conventuum ac provinciæ, præsertim in iis quæ iuxta leges nostras a singulis provinciis determinanda sunt.
2.  
   1. Uni capitulo provinciali competit ordinationes in statutum provinciæ inserendas facere, eas mutare vel abrogare;
   2. statutum provinciæ vel mutationes in eo faciendæ, sicut omnes aliæ ordinationes capituli provincialis, a magistro Ordinis adprobari debent.
3. Mutationes quæ modum celebrandi capitulum provinciale respiciunt quæque in statutum provinciæ inserendæ sunt, a celebratione capituli sequentis dumtaxat vim habere incipiunt.

Quælibet provincia præterea regitur: 

1. statuto provinciæ;
2. ordinationibus capituli provincialis;
3. ordinationibus prioris provincialis necnon aliorum qui diversimode provinciæ præficiuntur.

1. Illud dumtaxat statutum ut constitutio habeatur quod a tribus capitulis generalibus continuis fuerit acceptatum, et quidem per modum inchoationis in primo capitulo, adprobationis in secundo et confirmationis in tertio. Qui modus procedendi servandus est quoque pro abrogatione vel substantiali mutatione constitutionum.
2. Unum tamen capitulum generalissimum tribus capitulis generalibus æquipollet.

1. Spiritu evangelico ductus et regula s. Augustini innixus, Ordo noster regitur, præterquam cunctis Ecclesiæ legibus, decretis et privilegiis (cf. appendicem n. 14) quæ nos respiciunt:
   1. constitutionibus Ordinis;
   2. ordinationibus quæ sive in Libro constitutionum et ordinationum sive in actis capitulorum generalium inveniuntur;
   3. ordinationibus magistri Ordinis;
   4. consuetudinibus legitimis.
2. Quoties in iure nostro occurrit nomen constitutio significationem strictam accipit pro constitutionibus proprie dictis dumtaxat; verba autem leges nostræ vel ius nostrum indicant tum constitutiones tum ordinationes (cf. appendicem n. 1).

1. Assignatio est adscriptio fratris alicui provinciæ vel conventui determinato, cum omnibus iuribus et obligationibus nisi aliud suis in locis expresse caveatur. 
2. Assignatio vel est directa seu simpliciter facta, vel indirecta seu facta ratione officii vel studiorum. 
3. Assignatio vero ratione studiorum extra propriam provinciam, ad habendam vocem in electionibus non sufficit. Alia iura et obligationes fratris ratione studiorum assignati determinat prior provincialis provinciæ assignationis prævio consensu prioris provincialis provinciæ affiliationis, salvo n. 208. 
4. Assignatio ratione officii unice valet pro superioribus, illa autem ratione studiorum tantummodo pro studentibus extra provinciam. 
5. Quilibet frater iam inde a prima professione indiget assignatione directa determinato conventui, quæ est per se sine limitatione temporis. Assignatio indirecta durat solo tempore officii. Durationem assignationis indirectæ ratione studiorum determinat prior provincialis provinciæ assignationis de consensu prioris provincialis provinciæ affiliationis. Vigente assignatione indirecta, prævia assignatio directa inactiva manet; transacto tempore assignationis indirectæ reviviscit assignatio directa seu simpliciter facta.