Subtitle
Art. IV
De confirmatione aut cassatione electionis eiusque acceptatione
constitutio
Historia Revisionum
- Confirmata ACG 2016 Bologna n. 313
- Adprobata ACG 2013 Traugurii n. 255
Electio prioris conventualis indiget confirmatione prioris provincialis, vel prioris regionalis, si de fratre agitur in conventu vicariatus regionalis assignato et electo pro conventu in ipso vicariatu, nisi statutum vicariatus aliter provideat (cfr. appendicem n. 20).
Electio non est intimanda electo, nec iste potest eam acceptare aut eidem renuntiare ante confirmationem.
- Prior provincialis, aliquibus auditis fratribus gravioribus, ad communitatem eligentium non pertinentibus, potest electionem confirmare vel cassare et postulationem admittere vel reicere, prout ad bonum Ordinis expedire iudicaverit, etiamsi electio ad normam iuris facta fuerit; suam decisionem tamen non ultra moras necessarias differat.
- Si postulatio rite facta priori provinciali confirmanda admittenda esse videatur, ipse ad magistrum Ordinis recurrat pro dispensatione, qua obtenta, postulatum confirmare potest ad normam § I.
Prior provincialis ante confirmationem petere tenetur consensum:
- magistri Ordinis, si electus vel postulatus sit assignatus in conventu immediatæ iurisdictioni eiusdem magistri Ordinis subiecto;
- prioris provincialis provinciæ assignationis, si electus vel postulatus sit assignatus in alia provincia (cf. 270 § I); atque etiam prioris provincialis provinciæ affiliationis, si extra provinciam suæ affiliationis assignatus fuerit.
- Electus prior potest electionem suam acceptare vel recusare (cf. n. 466); sed prior provincialis potest ipsi iniungere, etiam sub præcepto formali, ut prioratus onus in se suscipiat.
- Prior in actu non potest cogi ad acceptandum prioratum alterius conventus.
- Electus in ipsis litteris confirmationis acceptationem vel recusationem suam propria manu subsignet, diem notando, coram duobus testibus qui eas et ipsi subscribant.
- Si vero renuntiat, rationes suæ renuntiationis priori provinciali exponat.
- Ille qui renuntiat vel qui infra quinque dies post acceptas litteras confirmationis non acceptaverit, omne ius e confirmatione quæsitum amittit.
Litteræ confirmationis et acceptationis legendæ sunt coram conventu. Tunc, emissa ab electo fidei professione (cf. appendicem n. 21), intellegitur capta prioratus possessio (cf. n. 301).
Prior provincialis, electionem aut postulationem infirmando, semper expresse dicat in scriptis se cassare prædictam electionem aut postulationem (cf. appendicem n. 22); aliter vocales non valent ad novam electionem procedere.
- Litteræ quibus electio cassatur aut postulatio reicitur aut recusatio admissa adnuntiatur, mittantur ad eum qui electioni præfuit, eidemque denuntiabitur utrum novæ electioni sit locus (cf. appendicem n. 22).
- His litteris acceptis, si nova electio sit facienda, præses debet infra mensem electores convocare, ad normam n. 461.
- Nova electio facienda est præside suppriore vel fratre ad normam n. 463 iam electo, iisdem retentis actuario et scrutatoribus ac in præcedenti electione, eadem servata forma, excepta obligatione celebrandi Missam de Spiritu Sancto.